Nýtingarleyfi
Leiðbeiningar fyrir umsókn um nýtingarleyfi á jarðhita, grunnvatni eða jarðefnum
Almennt um nýtingarleyfi
Nýting auðlinda úr jörðu er háð leyfi Umhverfis- og orkustofnunar sbr. IV. kafla laga nr. 57/1998 um rannsóknir og nýtingu á auðlindum í jörðu (auðlindalög).
Nýtingarleyfi felur í sér heimild til handa leyfishafa til að vinna úr og nýta viðkomandi auðlind á leyfistímanum í því magni og með þeim skilmálum öðrum sem tilgreindir eru í lögunum og stofnunin telur nauðsynlega.
Nánar er fjallað um kröfur vegna veitingar nýtingarleyfa í auðlindalögum. Við veitingu nýtingarleyfa skal þess gætt að nýting auðlinda í jörðu sé með þeim hætti að tekið sé tillit til umhverfissjónarmiða, nýting auðlindanna sé hagkvæm frá þjóðhagslegu sjónarmiði og tekið sé tillit til nýtingar sem þegar er hafin í næsta nágrenni. Telji leyfisveitandi að umsækjandi um nýtingarleyfi uppfylli ekki þessar kröfur getur hann synjað um nýtingarleyfi eða sett sérstök skilyrði í nýtingarleyfi af þessu tilefni.
Hvenær þarf ekki að sækja um leyfi?
Ekki þarf nýtingarleyfi fyrir:
- Jarðefni: Berg, grjót, möl, leir, sand, vikur, gjall og önnur slík gos- og steinefni, svo og mold, mó og surtarbrand á eignarlandi.
- Jarðhiti: Landeiganda er heimilt án leyfis að hagnýta í eignarlandi sínu til heimilis- og búsþarfa, þar með talið til ylræktar, iðnaðar og iðju, allt að 3,5 MW miðað við vermi sem tekið er úr jörðu alls innan eignarland
- Grunnvatn: Landeiganda er heimilt án leyfis að hagnýta í eignarlandi sínu til heimilis- og búsþarfa, þar með talið til fiskeldis, iðnaðar og iðju, allt að 70 ltr/sek.
Landeiganda ber þó að tilkynna Umhverfis- og orkustofnun um fyrirhugaðar jarðboranir og aðrar meiri háttar framkvæmdir vegna óleyfisskyldrar nýtingar. Umhverfis- og orkustofnun er heimilt að setja landeiganda þau skilyrði sem nauðsynleg eru talin vegna öryggis eða af tæknilegum ástæðum eða ef ætla má að boranir geti spillt nýtingu sem fram fer á svæðinu eða möguleikum til nýtingar síðar.
Gjaldtaka
Umhverfis- og orkustofnun er heimilt að innheimta gjald fyrir nýtingarleyfi og fyrir eftirlit sem stofnuninni er falið. Gjaldið má ekki vera hærra en nemur kostnaði við undirbúning, svo sem vegna nauðsynlegrar aðkeyptrar þjónustu, afgreiðslu leyfis og eftirlits með leyfishöfum, samanber 20. gr. a. auðlindalaga.
Umsóknir
Til að sækja um nýtingarleyfi skal fyrst fylla út viðeigandi umsóknareyðublað hér að neðan. Umsókn ásamt fylgigögnum er svo skilað með því að ýta á hnapp þar fyrir neðan.
Helstu gögn og upplýsingar sem fylgja skulu umsókn um nýtingarleyfi (sjá nánari leiðbeiningar í umsóknareyðublaði):
- Nafn umsækjanda, kennitala hans, heimilisfang og upplýsingar um rekstrarform.
- Fyrirhugað nýtingarsvæði, kort af nýtingarsvæði ásamt hnitsetningu þess skal fylgja umsókn.
- Upplýsingar um stöðu skipulagsmála og stöðu varðandi málsmeðferð vegna umhverfismats.
- Upplýsingar um fyrirhugaða nýtingu, nýtingarmagn, nýtingarhraði, gildistíma sem óskað er eftir og fleira.
- Framkvæmdir tengdar nýtingu.
- Umhverfisþættir, þ.m.t. önnur nýting í nágrenni nýtingarsvæðis, rannsóknir sem farið hafa fram, mótvægisaðgerðir og fleira.
- Áhrifamat fyrir vatnshlot. skv. lögum nr. 36/2011 um stjórn vatnamála.
- Samkomulag við landeigendur og eigendur orkulinda um endurgjald fyrir nýtingu viðkomandi auðlindar.
- Drög að vöktunaráætlun.
- Upplýsingar um borholur.
Veldu umsóknarhnappinn hér að neðan þegar viðeigandi skjal hér að ofan hefur verið fyllt út.
Var efnið hjálplegt?
Hjálpaðu okkur að bæta gæði efnisins
