Um Raforkueftirlitið
Raforkueftirlitið er sjálfstæð eining innan Umhverfis- og orkustofnunar og fer með þann þátt sem snýr að eftirliti með raforkumarkaðnum í samræmi við ákvæði raforkulaga nr. 65/2003. Eftirlitið lýtur að öllum fyrirtækjum sem starfa samkvæmt raforkulögum.
Eftirlit á raforkumarkaði
Með innleiðingu þriðju raforkutilskipunar (2009/72/EB) í íslenskan rétt var eftirlitsskylda og sjálfstæði eftirlitsaðila með raforkumarkaði eflt.
Raforkueftirlitinu ber að hafa eftirlit með því að fyrirtæki á raforkumarkaði starfi samkvæmt raforkulögum og tryggja virka samkeppni á raforkumarkaði og hagkvæma uppbyggingu flutnings- og dreifikerfa raforku. Þannig veitir Raforkueftirlitið sérleyfisfyrirtækjum, sem annast flutning og dreifingu raforku, aðhald til að tryggja að uppbygging innviða fyrir dreifingu og flutning raforku sé hagkvæm og skilvirk, ásamt því að viðhafa eftirlit með því að raforkunotendur fái afhenta raforku á ákveðnum gæðum á sanngjörnu verði. Sérleyfisfyrirtækin skulu gæta jafnræðis í hvívetna gagnvart öllum sölufyrirtækjum raforku. Til að ná fram því markmiði eru leyfðar tekjur sérleyfisfyrirtækja ákvarðaðar, lögum samkvæmt, með setningu og uppgjöri tekjumarka. Þannig eru leyfðar tekjur ákvarðaðar sem setja mörk á það hversu mikið sérleyfisfyrirtækin geta rukkað fyrir flutning og dreifingu raforku til sinna viðskiptavina.
Eftirlit á smásölu- og heildsölumarkaði
Raforkueftirlitið hefur einnig eftirlit með fyrirtækjum á smásölu- og heildsölumarkaði raforku til að stuðla að virkri samkeppni á markaði og að markaðurinn starfi eðlilega ásamt því að tryggja neytendavernd. Í gegnum heildsölumarkað raforku selja vinnslufyrirtæki raforku til smásölufyrirtækja sem selja raforkuna til fjölda almennra notenda, íslenskra heimila og fyrirtækja. Öllum notendum á Íslandi er frjálst að kaupa raforku af þeim orkusala sem þeir kjósa, hvort sem um er að ræða stórnotanda eða heimili og fyrirtæki.
Sem eftirlitsaðili vinnur Raforkueftirlitið að því að skapa samkeppni í vinnslu og viðskiptum með raforku, stuðla að skilvirkni og hagkvæmni í flutningi og dreifingu raforku, tryggja fullnægjandi raforkuöryggi, hagsmuni neytenda og neytendavitund á raforkumarkaði, stuðla að nýtingu endurnýjanlegra orkugjafa og taka tillit til umhverfissjónarmiða. Þessi markmið eru leiðarvísir í verkefnum Raforkueftirlitsins.
Var efnið hjálplegt?
Hjálpaðu okkur að bæta gæði efnisins
