Raforkueftirlitið

Raforkueftirlitið hefur birt ákvörðun um leyfða arðsemi af flutningi og dreifingu raforku fyrir árið 2027. Arðsemin byggir á vegnum fjármagnskostnaði.  Fyrir árið 2027 nemur veginn fjármagnskostnaður fyrir skatt:  5,28% fyrir flutning raforku til stórnotenda  5,76% fyrir flutning raforku til dreifiveitna  5,81% fyrir dreifing raforku til almennra notenda  Hlutverk leyfðrar arðsemi  Tekjumörk sérleyfisfyrirtækja byggja á leyfðum fjármagnskostnaði, rekstrarkostnaði og afskriftum. Leyfður fjármagnskostnaður endurspeglar kostnað fyrirtækjanna af því fjármagni sem er bundið í starfseminni. Hann skiptist í tvennt:  Leyfð arðsemi fastafjármuna, þar sem veginn fjármagnskostnaður er margfaldaður með verðlagsleiðréttu bókfærðu virði þeirra eigna sem teljast til sérleyfisstarfseminnar.  Leyfð arðsemi á veltufé, sem er reiknað með föstu hlutfalli (t.d. 20% í tilfelli flutningsfyrirtækisins) af tekjumörkum fyrra árs og síðan margfaldað með vegnum fjármagnskostnaði, til að endurspegla fjármagnsþörf vegna tímatafar á innheimtum tekjum.   Endurskoðun fastra matsbreytna  Sérfræðinganefnd hefur unnið að endurskoðun fastra matsbreytna í samræmi við 7. gr. reglugerðar nr. 192/2016. Nefndin hefur birt drög að áliti sínu. Nefndin hefur ekki lokið störfum sínum og því eru fastar matsbreytur eru óbreyttar frá fyrra ári.  Niðurstöður nefndarinnar og samráð við hagsmunaaðila er skilyrði þess að Raforkueftirlitið geti lagt fram tillögu til ráðherra um endurskoðun fastra matsbreytna um leyfða arðsemi.  Ákvörðun tekin árlega  Samkvæmt reglugerð nr. 192/2016 ber Raforkueftirlitinu að ákvarða veginn fjármagnskostnað fyrir næsta almanaksár eigi síðar en 15. maí ár hvert.   

Alþingi hefur samþykkt frumvarp Jóhanns Páls Jóhannssonar, umhverfis- orku- og loftslagsráðherra til laga um breytingu á raforkulögum nr. 65/2003. Frumvarpið mælir fyrir um tilteknar hátternisreglur í raforkuviðskiptum og eftirlit til að stuðla að gagnsæi og heiðarleika á heildsöluorkumarkaði. Tilgangur frumvarpsins er jafnframt að setja lagaramma um starfsemi viðskiptavettvanga raforku, lýsa hlutverki og skyldum þeirra sem fara með slíka starfsemi og kveða á um eftirlit Raforkueftirlitsins. Framboð og eftirspurn myndar markaðsverð Töluverð þróun hefur orðið á raforkuviðskiptum á íslenskum heildsöluorkumarkaði. Helsta þróunin snýr að því að samningssamband um kaup- og sölu á raforku kemst á með skipulögðum hætti á viðskiptavettvöngum raforku, þar sem pörun viðskipta, það er framboð og eftirspurn, myndar opinbert markaðsverð. Áður fyrr áttu viðskiptin sér stað milli tveggja samningsaðila, yfir borðið eða í gegnum viðskiptavef Landsvirkjunar. Traust og trúverðugleiki Frumvarpið sem nú er orðið að lögum, er mikilvægur liður í að tryggja traust og trúverðugleika markaðsaðila til markaðarins og að markaðsverð endurspegli raunverulegt framboð og eftirspurn, auk atburða í kerfinu hverju sinni. Ákvæði frumvarpsins eiga sér meðal annars fyrirmynd í reglugerð ESB nr. 1227/2011 um heildstæðan og gagnsæjan heildsöluorkumarkað (REMIT), ásamt þeim breytingum sem orðið hafa á þeirri reglugerð með REMIT II. Aukin verkefni fyrir Raforkueftirlitið Raforkueftirlitið fer með eftirlit á raforkumarkaði en nýju raforkulögin fela í sér aukin verkefni. Raforkueftirlitinu ber nú einnig að gefa út leiðbeinandi tilmæli um túlkun á ákvæðum laganna (20. gr. a –i), sinna markaðseftirliti og gefa út leyfi fyrir starfsemi viðskiptavettvanga raforku á grundvelli 18. gr. a. raforkulaga. Samráð við gerð laganna Frumvarpið var unnið í samráði við Raforkueftirlitið og hefur það aðstoðað bæði ráðuneytið og Alþingi við meðferð málsins. Raforkueftirlitið hefur meðal annars veitt ráðuneytinu opinbera umsögn. Raforkueftirlitið mun á næstu vikum verða ráðuneytinu til ráðgjafar og umsagnar við gerð reglugerða um 20. gr. a. – 20. gr. i. raforkulaga, og skipulagskröfum viðskiptavettvanga ásamt því að vinna leiðbeiningar um túlkun 20. gr. a. – 20. gr. i. í samráði við markaðsaðila.

Raforkueftirlitið hefur samþykkt kerfisáætlun Landsnets fyrir tímabilið 2025 - 2034. Áætlunin er ein sú viðamesta í sögu fyrirtækisins og leggur grunn að nýrri kynslóð byggðalínu sem mun tengja landshluta saman með auknu öryggi og flutningsgetu. Með samþykktinni er stigið mikilvægt skref í að tryggja innviði fyrir orkuskipti þjóðarinnar á sama tíma og gætt er að hagkvæmni í rekstri og fjárfestingum. Raforkukerfi Íslands stendur frammi fyrir miklum áskorunum næstu árin þar sem krafan um hröð orkuskipti og aukna flutningsgetu vegna nýrra atvinnuvega þarf að vega á móti sjónarmiðum um hóflega gjaldskrárþróun og umhverfisvernd.

Raforkueftirlitið hefur gefið út nýtt mælaborð sem varpar skýrara ljósi á stöðu og þróun smásölumarkaðar raforku á Íslandi. Með því er stigið mikilvægt skref í átt að auknu gagnsæi og betra aðgengi að upplýsingum um markaðinn. Í mælaborðinu má meðal annars sjá lykilupplýsingar um stig samþjöppunar á markaðnum og hvernig söluaðilaskipti hafa þróast yfir tíma. Þá gefst notendum kostur á að sía upplýsingar eftir því hvort um ræðir heimili eða fyrirtæki og fylgjast með hlutfalli þeirra sem skipta um raforkusala frá einu tímabili til annars. Með þeim hætti verður auðveldara að átta sig á því hvort samkeppni á markaðnum er að aukast eða dragast saman. Markmið mælaborðsins er að efla upplýsingagjöf til viðskiptavina raforkusala, sem og annarra markaðsaðila. Með skýrri og aðgengilegri framsetningu upplýsinga vill Raforkueftirlitið stuðla að virkari samkeppni á smásölumarkaði raforku. Gögn í mælaborðinu verða uppfærð ársfjórðungslega og gert er ráð fyrir að mælaborðið taki áfram breytingum og eflist með nýjum greiningum og frekari upplýsingum eftir því sem þær verða tiltækar.