Skýrslur og ítarefni

Ísland er aðili að samningnum um loftmengun sem berst langar leiðir milli landa (CLRTAP). Hann var samþykktur í Genf 1979 og tók gildi 1983. 51 ríki eru aðilar að samningnum og á grunni hans hafa verið gerðar bókanir sem hver um sig tekur á ákveðnum efnaflokkum.

Helstu bókanirnar eru þessar:

• Helsinki-bókunin um brennistein (1985)
• Sofia-bókunin um köfnunarefnisoxíð (1988)
• Genfar-bókunin um rokgjörn lífræn efni (1991)
• Oslóar-bókunin um brennistein (1994)
• Árósa-bókunin um þungmálma (1998)
• Árósa-bókunin um þrávirk lífræn efni (1998)
• Gautaborgar-bókunin um að draga úr súrnun, ofauðgun og ósoni við jörðu (1999)

Ísland hefur undirritað samninginn sjálfan og báðar Árósa-bókanirnar, það er bókunina um þungmálma og bókunina um þrávirk lífræn efni. Hins vegar hefur Ísland aðeins staðfest aðra bókunina, þá sem fjallar um þrávirk lífræn efni. Aðildarríki skulu draga úr losun þeirra loftmengunarefna sem tiltekin eru í bókununum eða hætta notkun þeirra. Aðildarríki skulu árlega gera skýrslu um losun þessara efna. Skýrslur Íslands, á ensku, eru hér fyrir ofan. Þó Ísland hafi aðeins staðfest eina bókun, um losun þrávirkra lífrænna efna, eru í skýrslunum upplýsingar um losun annarra efna ef þær upplýsingar liggja fyrir.