Eftirlit með sérleyfisfyrirtækjum
Raforka er flutt frá raforkuvirkjun til notenda í gegnum flutningskerfi og dreifikerfi
Flutningur og dreifing raforku er sérleyfisstarfsemi sem þýðir að einungis eitt fyrirtæki má sinna þeirri þjónustu á hverju svæði. Raforkueftirlitið hefur eftirlit með fyrirtækjum í flutningi og dreifingu til að tryggja þjóðhagslega hagkvæman rekstur og fjárfestingar í raforkukerfinu.
Flutningskerfið flytur mikið magn raforku á hárri spennu á milli landshluta, en dreifikerfið dreifir síðan raforkunni á lægri spennu til einstakra notenda.
Hver raforkunotandi er bundinn ákveðinni dreifiveitu, sem hefur sérleyfi til dreifingar raforku á viðkomandi dreifiveitusvæði þar sem notandinn er staðsettur. Á hinn bóginn er notendum frjálst að kaupa raforkuna sjálfa af hvaða sölufyrirtæki sem er.
Landsnet sér um allan flutning raforku á Íslandi en fimm dreifiveitur sjá um dreifingu.
Kerfisstjórnun flutnings er í höndum Landsnets og kerfisstjórnun dreifingar er í höndum hverrar dreifiveitu.
Dreifiveiturnar eru HS Veitur, Norðurorka, Orkubú Vestfjarða, RARIK og Veitur.
HS Veitur dreifa raforku á Reykjanesskaga, í Hafnarfirði, á Álftanesi og syðri hluta Garðabæjar, í Árborg og í Vestmannaeyjum.
Norðurorka dreifir raforku á Akureyri.
Orkubú Vestfjarða dreifir raforku á Vestfjörðum.
RARIK dreifir raforku út um allt land að slepptum Vestfjörðum, suðvesturhorninu, Árborg, Vestmannaeyjum og Akureyri.
Veitur dreifa raforku í Reykjavík, á Seltjarnarnesi, í Kópavogi, í Garðabæ norðan Hraunholtslækjar (Vífilsstaðalækjar), Mosfellsbæ, Kjalarnesi og á Akranesi.
Var efnið hjálplegt?
Hjálpaðu okkur að bæta gæði efnisins
