Samantekt um losun gróðurhúsalofttegunda á Íslandi
Nýjustu upplýsingar um losun gróðurhúsalofttegunda á Íslandi og skuldbindingar Íslands í loftslagsmálum.
Síðast uppfært 22. september 2026. Sjá upptöku frá kynningarfundi ráðuneytis.
Lykiltölur
Heildarlosun gróðurhúsalofttegunda á Íslandi
10,6
milljón tonn
Heildarlosun gróðurhúsalofttegunda á Íslandi var 10,6 milljón tonn af CO₂-ígildum (CO₂-íg.) árið 2025 og hefur aukist um 2,0% frá árinu 1990. Losun náði hámarki árið 2008 og hefur síðan þá dregist saman um 12%.
4,49
milljón tonn
Heildarlosun án landnotkunar var 4,49 milljón tonn af CO₂-íg. árið 2025 og hefur aukist um 22% frá árinu 1990.
6,08
milljón tonn
Losun frá landnotkun var 6,08 milljón tonn CO₂-íg. árið 2025 og hefur dregist saman um 9,1% frá árinu 1990.
2,79
milljón tonn
Samfélagslosun Íslands var 2,79 milljón tonn af CO₂-íg. árið 2025 og hefur dregist saman um 10% frá árinu 2005.
1,68
milljón tonn
Losun sem fellur undir viðskiptikerfi ESB (ETS) á Íslandi var 2,37 milljón tonn CO₂-íg. árið 2025. Þar af voru 1,68 milljón tonn CO₂-íg. frá staðbundnum iðnaði sem er 97% aukning frá árinu 2005. Samdráttur hefur átt sér stað í kerfinu í heild innan Evrópu.
Heildarlosun
Heildarlosun gróðurhúsalofttegunda á Íslandi var 10,6 milljón tonn af CO₂-ígildum (CO₂-íg.) árið 2025 og hefur aukist um 2,0% frá árinu 1990. Losun náði hámarki árið 2008 og hefur dregist nokkuð saman síðan. Til lengri tíma má reikna með samdrætti í losun á Íslandi. Reiknað er með að heildarlosun Íslands verði komin niður í 8,8 milljón tonn CO₂-íg. í kringum 2040 og í 7,5 milljón tonn CO₂-íg. um 2050 samkvæmt framreikningum sem byggja á aðgerðum stjórnvalda. Helstu áhrifaþættir á samdrátt yfir spátímabilið eru endurheimt votlendis, aukin binding í skógrækt, landgræðsla og útfösun jarðefnaeldsneyta.
Myndræn framsetning á sögulegri losun Íslands og hvernig hún gæti þróast til framtíðar. Mynd eftir Fífu Jónsdóttur.
Heildarlosun gróðurhúsalofttegunda á Íslandi skiptist í losun vegna orku, iðnaðar og vörunotkunar, landbúnaðar, landnotkunar og úrgangs. Heildarlosun ríkja er gefin upp án alþjóðasamgangna og jafnframt birt bæði með og án losunar vegna landnotkunar.
Sviðsmynd fyrir framreiknaða losun byggir á líklegri þróun til framtíðar ásamt því að taka til greina aðgerðir úr aðgerðaáætlun í loftslagsmálum sem voru í framkvæmd eða í innleiðingarferli í september 2026.
Skuldbindingar Íslands í loftslagsmálum
Ísland er aðili að rammasamningi Sameinuðu þjóðanna um loftslagsbreytingar (e. United Nations Framework Convention on Climate Change; UNFCCC), en undir honum var Parísarsamningurinn samþykktur árið 2015. Samkvæmt Parísarsamningnum setja aðildarríkin sér markmið um samdrátt í losun gróðurhúsalofttegunda, svonefnd landsákvörðuð framlög (Nationally Determined Contributions; NDCs). Fyrsta landsákvarðaða framlagið nær til 2030 og annað til 2035. Til að ná þessum markmiðum hefur Ísland innleitt reglur Evrópusambandsins (ESB) um samdrátt í losun til og með 2030, með upptöku viðeigandi reglugerða inn í EES-samninginn.
Losun Íslands má almennt skipta í þrjá meginflokka þegar hún er skoðuð út frá skuldbindingum gagnvart ESB: Samfélagslosun (e. Effort Sharing Regulation; ESR), landnotkun (e. Land Use, Land-Use Change and Forestry; LULUCF) og losun sem fellur undir viðskiptakerfi ESB með losunarheimildir (e. EU Emissions Trading System; EU ETS; ETS-kerfi).
- Samfélagslosun er einkum frá vegasamgöngum, landbúnaði, sjávarútvegi, jarðvarmavirkjunum, vörunotkun og úrgangi.
- Undir viðskiptakerfi ESB með losunarheimildir fellur losun frá stóriðju, flugi og sjóflutningum innan Evrópska efnahagssvæðisins (EES), en einungis losun frá staðbundnum iðnaði er hluti af heildarlosun Íslands.
- Losun frá landnotkun á við um losun og bindingu vegna landnotkunar og skógræktar.
Samfélagslosun Íslands
Samfélagslosun Íslands inniheldur aðallega losun frá vegasamgöngum, landbúnaði, sjávarútvegi, úrgangi, jarðvarmavirkjunum og vörunotkun. Árið 2025 var samfélagslosun 2,79 milljón tonn CO₂-íg. og er það 26% af heildarlosun Íslands (með landnotkun). Umfangsmestu losunarflokkarnir innan samfélagslosunar eru vegasamgöngur, landbúnaður og fiskiskip en saman telja þeir 74% af samfélagslosun Íslands.
- Milli áranna 2024 og 2025 dróst samfélagslosun Íslands saman um 2,7%. Samfélagslosun ársins 2024 var í hærra lagi, 2025 losunin er 0,8% lægri en losun ársins 2023.
- Samfélagslosun hefur dregist saman um 10% frá árinu 2005.
- Líkleg samdráttarkrafa Íslands, í skuldbindingunum gagnvart ESB, er að draga úr samfélagslosun um 41% árið 2030 miðað við árið 2005. Núgildandi krafa er 29%.
- Ísland fær árlegar losunarúthlutanir fyrir losun frá þeim geirum sem tilheyra samfélagslosun. Bráðabirgðaútreikningar (byggðir á 41% samdráttarkröfu) sýna að fyrir árið 2025 mun magn þeirra vera um 2,44 milljónir tonna CO2-íg. sem er minna en losun sama árs (sjá Mynd 5). Til boða stendur þó ákveðinn sveigjanleiki milli skuldbindingakerfa.
- Líklegt er að Ísland nái markmiðum fyrir 2021-2025 í samfélagslosun þegar tekið er tillit til sveigjanleika milli skuldbindingakerfa.
- Framreikningar í samfélagslosun sýna áframhaldandi samdrátt í losun yfir spátímabilið 2026-2055.
- Samdrátturinn er áætlaður 21% árið 2030 miðað við losun ársins 2005. Þótt að tillit sé tekið til sveigjanleika milli skuldbindingakerfa, er ólíklegt að Ísland nái skuldbindingum sínum fyrir árin 2026-2030 í samfélagslosun án þess að þurfa að kaupa losunarúthlutanir frá öðrum ríkjum. Því er brýnt að nýta þau tækifæri sem eru í boði til frekari aðgerða.
- Samdrátturinn er áætlaður 30% árið 2035 miðað við losun ársins 2005. Hluti landsákvarðaða framlags Íslands (NDC) til Parísarsamningsins er markmið um 50-55% samdrátt í samfélagslosun árið 2035 miðað við 2005.
Í töflunni að neðan má sjá helstu breytingar í samfélagslosun Íslands milli áranna 2024 og 2025 skipt eftir undirflokkum.
| Losunarflokkur | Breyting | Þús. tonn CO₂-íg. | % | Skýring |
|---|---|---|---|---|
| Fiskiskip | Samdráttur | -38 | -7,3% | Minni eldsneytisnotkun |
| Fiskimjölsverksmiðjur | Samdráttur | -21 | -37% | Skerðing raforku árið 2024 |
| Urðun úrgangs | Samdráttur | -18 | -8,8% | Minni urðun, betri flokkun |
| Jarðvarmavirkjanir | Samdráttur | -9,2 | -4,1% | Aukin föngun koldíoxíðs |
| Eldsneytisbruni til raforkuframleiðslu | Samdráttur | -9,2 | -60% | Minni eldsneytisnotkun |
| Vegasamgöngur | Aukning | +12 | +1,3% | Minni íblöndun í eldsneyti |
Vegasamgöngur (33%)
Losun frá vegasamgöngum nam 917 þús. tonnum CO₂-íg. árið 2025.
- Losun frá vegasamgöngum náði hápunkti árið 2018 og nam þá 983 þús. tonnum CO₂-íg. en það var einnig metár í fjölda ferðamanna.
- Með heimsfaraldri árið 2020 var losunin töluvert minni og nam þá 837 þús. tonnum CO₂-íg. og jókst svo aftur upp í 933 þús. tonn CO₂-íg. árið 2022.
- Aukning varð í losun milli áranna 2024 og 2025 upp á 12 þús. tonn CO₂-íg. og nemur það 144 þús. tonna CO₂-íg. aukningu frá árinu 2005.
- Losun á hvern ekinn kílómetra dróst saman um 22% á milli áranna 2005 og 2025, en jókst um 0,9% á milli 2024 og 2025.
- Reiknað er með að losun frá vegasamgöngum dragist saman næstu árin vegna áframhaldandi orkuskipta og verði lítil sem engin árið 2055.
- Spáð er um 1,7% hærri losun frá vegasamgöngum árið 2030 miðað við 2005 ef tekið er mið af aðgerðum stjórnvalda.
Landbúnaður (24%)
Losun frá landbúnaði nam 668 þús. tonnum CO₂-íg. árið 2025, sem er nánast óbreytt losun frá 2024.
- Stærstur hluti losunar frá landbúnaði er vegna sauðfjár- og nautgriparæktar, en iðragerjun og meðhöndlun búfjáráburðar í þeim greinum er uppspretta 46% losunar frá landbúnaði eða 310 þús. tonn CO₂-íg.
- Næst stærsti losunarþátturinn er hláturgaslosun frá framræstu landi, 29% af heildarlosun landbúnaðar eða 193 þús. tonn CO₂-íg.
- Hlutdeild áburðarnotkunar í heildarlosun landbúnaðar var 15% eða 99 þús. tonn CO₂-íg.
- Losun frá landbúnaði dróst saman um 418 tonn CO₂-íg. milli áranna 2024 og 2025. Frá 2005 hefur hún dregist saman um 18 þús. tonn CO₂-íg.
- Spáð er hægari samdrætti í losun frá landbúnaði en fyrir aðra flokka samfélagslosunar. Þetta gerir það að verkum að hlutdeild landbúnaðar í samfélagslosun eykst yfir spátímabilið og nær hún yfir helming af samfélagslosun við lok spátímabilsins, árið 2055.
- Spáð er um 5,2% lægri losun í landbúnaði árið 2030 miðað við árið 2005.
Fiskiskip (17%)
Losun frá fiskiskipum nam 482 þús. tonnum CO₂-íg. árið 2025. Losun frá fiskiskipum er háð eldsneytisnotkun og var óvenjuhá árið 2024 vegna meiri eldsneytisnotkunar erlendra fiskiskipa. Losun ársins 2025 svipar til losunarinnar árin 2022 og 2023.
- Losun frá fiskiskipum hefur dregist saman um 35% eða 260 þús. tonn CO₂-íg. milli 2005 og 2025.
- Reiknað er með að losun frá fiskiskipum dragist saman næstu árin vegna aukinnar skilvirkni. Eftir 2045 er reiknað með hraðari samdrætti vegna orkuskipta.
- Spáð er 39% lægri losun frá fiskiskipum árið 2030 miðað við 2005.
Úrgangur (7%)
Losun vegna urðunar úrgangs nam 185 þús. tonnum CO₂-íg. árið 2025.
- Losun vegna urðunar úrgangs dróst saman um 8,8% milli 2024 og 2025 og hefur dregist saman um 35% frá árinu 2005. Minna magns pappírs og pappa í urðun frá 2005 og minna magns lífúrgangs í urðun frá 2018 hafa drifið áfram þessa lækkun.
- Heildarmagn lífniðurbrjótanlegs úrgangs til urðunar hefur lækkað töluvert undanfarin ár og lækkar áfram lítillega frá 2024 til 2025.
- Spáð er miklum samdrætti í losun frá urðun úrgangs næstu árin vegna útflutnings Sorpu á blönduðum heimilisúrgangi, sérsöfnunar á lífrænum úrgangi og banns við urðun sérsafnaðs úrgangs. Reiknað er með að þessi samdráttur verði 58% árið 2030 og 73% árið 2035 í samanburði við árið 2005.
Landnotkun
Losun og binding vegna landnotkunar skiptist í fimm flokka: mólendi, ræktað land, votlendi, skóglendi og önnur losun (byggð og viðarvörur). Umfang landnotkunarflokksins á Íslandi er að mörgu leyti frábrugðið umfangi þessa flokks hjá öðrum ríkjum. Í flestum Evrópuríkjum er meiri binding en losun í landnotkunarflokknum, þ.e. nettóbindingu, en á Íslandi er losunin mun meiri en bindingin, þ.e. hér er nettólosun.
Þetta skýrist af miklu umfangi framræsts lífræns jarðvegs (framræsts votlendis) og þeirri miklu losun sem stafar frá þessum jarðvegi. Losunin er það mikil að hún vegur meira en sú verulega binding sem á sér stað bæði í mólendi og skóglendi, þannig að landnotkunargeirinn í heild sinni er nettó uppspretta af losun.
- Nettólosun sem fellur undir landnotkun var 6,08 milljón tonn CO₂-íg. árið 2025 og er það um 58% af heildarlosun Íslands árið 2025.
- Meirihluti losunar frá landnotkun stafar af framræstum lífrænum jarðvegi og er sú losun talin fram bæði undir mólendi og ræktuðu landi eftir aðstæðum. Fyrir vikið eru mólendi og ræktað land stærstu uppsprettur losunar vegna landnotkunar á Íslandi.
- Losun frá landnotkun dróst saman um 136 þús. tonn CO₂-íg. á milli 2024 og 2025, aðallega vegna minna umfangs ræktaðs lands. Frá 1990 hefur losunin lækkað um 9,1%.
- Nettóbinding kolefnis í skóglendi á Íslandi var um 569 þús. tonn CO₂-íg. árið 2025 og hefur 18-faldast á árunum 1990-2025.
- Binding vegna endurheimtar þurrlendis (landgræðslu og takmörkunar á beit) var um 686 þús. tonn CO₂-íg. Samdráttur í losun vegna endurheimtar votlendis var um 27 þús. tonn CO₂-íg.
- Reikna má með samdrætti í losun frá landnotkun yfir spátímabilið 2026-2055, þá fyrst og fremst vegna vaxandi bindingar í skóglendi og landgræðslusvæðum og vegna endurheimtar votlendis. Áætlað er að losun minnki um um 2200 þús. tonn CO₂-íg. frá 2026 til 2055 eða um 2900 þús. tonn á milli 1990-2055. Framreikningar fyrir losun frá landnotkun taka mið af aðgerðum stjórnvalda.
Umbætur í losunarbókhaldi
Ýmsar umbætur í mati á losun og bindingu vegna landnotkunar hafa verið gerðar undanfarin ár og stefnt er að enn frekari umbótum á losunarbókhaldinu á næstu árum til að draga enn frekar úr óvissu. Meðal verkefna sem eru í gangi eru mælingar á losun og bindingu í mólendi og votlendi, bæði óröskuðu og hnignuðu (framræstu) sem og mælingar í ræktarlandi. Þetta er hluti þeirra verkefna sem unnið er að samkvæmt umbótaáætlun.
Markmið og skuldbindingar í landnotkun
Skuldbinding Íslands á fyrri helmingi Parísartímabilsins (2021-2025) er að nettólosun má ekki aukast umfram ákveðin viðmið. Það fer eftir landnotkunarflokkum hvernig losun og binding frá landnotkun telur gagnvart ESB skuldbindingum og eru uppgjörsreglurnar einnig ólíkar milli fyrra (2021-2025) og seinna (2026-2030) skuldbindingatímabils. Miðað við framreikninga mun Ísland líklega standast skuldbindingar fyrra tímabilsins. Ekki hefur enn verið staðfest hver samdráttarkrafan verður á seinna tímabilinu.
Einnig hefur Íslands sett sér markmið um að ná fram samdrætti í losun frá landnotkun (LULUCF) um 400-500 þús. tonn CO₂-íg. árið 2035 miðað við árið 2025. Það lítur út fyrir að Ísland muni ná því markmiði.
Mólendi
Þessi flokkur er stærsta uppspretta gróðurhúsalofttegunda á Íslandi. Losun koldíoxíðs frá mólendi kemur að langmestu leyti frá lífrænum jarðvegi sem hefur verið framræstur í 20 ár eða meira og hefur aukin framræsla á síðustu áratugum leitt til aukinnar losunar.
- Nettólosunin var um 5,02 milljón tonn CO₂-íg. árið 2025.
- Á tímabilinu 2026–2030 er áætlað að endurheimta um 15,3 þús. hektara af röskuðu (framræstu) votlendi, sem jafngildir tæplega 300 þús. tonn CO₂-íg. í samdrátt.
- Á sama tímabili er jafnframt áætlað að endurheimta um 50 þús. hektara af röskuðu þurrlendi, sem mun skila sér í samdrætti í losun sem nemur um 108 þús. tonnum CO₂-íg.
- Þessar aðgerðir hafa margþættan ávinning í för með sér auk samdráttar í losun, þær auka líffræðilega fjölbreytni, tempra vatnsflæði og hindra jarðvegseyðingu auk þess að efla viðnámsþrótt vistkerfa gegn loftslagsbreytingum.
- Með aukinni endurheimt væri hægt að auka samdrátt til muna í þessum flokki en núverandi tölur í framreikningum byggja á gildandi fjármálaáætlun og forgangsaðgerðum stjórnvalda í loftslagsmálum.
Ræktað land
Ræktað land er stór uppspretta losunar gróðurhúsalofttegunda. Losunin er mestöll vegna ræktaðs lands á framræstum votlendum. Ræktað land er land sem notað er í landbúnaði til ræktunar á grasi, korni og öðrum landbúnaðarafurðum svo sem kartöflum.
- Árið 2025 var nettólosunin 1,57 milljón tonn CO₂-íg.
- Talið er að flatarmál ræktaðs lands hafi minnkað frá 1990, samhliða minnkun á heyfeng og fjölda sauðfjár.
Votlendi í nýtingu
Öll votlendissvæði sem hafa orðið til vegna breytinga á vatnsstöðu falla í þennan flokk, nánar tiltekið uppistöðulón og endurheimt votlendi. Náttúruleg votlendi þar sem vatnsstaða hefur ekki verið röskuð eru undanskilin, jafnvel þó þau séu innan beitarsvæða. Losun úr þessum flokki er vegna losunar metans (CH₄) sem stafar af náttúrulegu ferli sem er dæmigert fyrir mýrarsvæði.
- Árið 2025 var nettólosun frá votlendi á Íslandi 17 þús. tonn CO₂-íg.
- Endurheimt votlendis dregur úr losun koldíoxíðs (CO₂), eykur upptöku CO₂ en eykur jafnframt losun metans (CH₄). Metan er 28 sinnum öflugri gróðurhúsalofttegund en CO₂ og þess vegna er nettó losun frá votlendi. Þrátt fyrir það þá dregur endurheimt votlendis úr losun vegna þess að CO₂ losun frá framræstu landi var svo mikil fyrir endurheimt.
Skóglendi
Flokkurinn skóglendi hefur meiri bindingu en losun. Bindingin hefur aukist mikið frá árinu 1990, eða úr rúmlega 30 þúsund tonnum í rúmlega 569 þúsund tonn CO₂-íg. árið 2025.
- Gert er ráð fyrir áframhaldandi aukningu í bindingu frá skóglendi. Helstu ástæður þessa eru aukin árleg nýskógrækt og vaxandi binding núverandi skóga með auknum aldri þeirra.
- Núverandi flatarmál ræktaðs skóglendis er um 62 þús. hektarar. Miklir möguleikar eru á aukinni nýtingu ræktaðra skóga, en einungis voru nýtt um 14% af þeim skógi sem er mögulegur til viðarnytja.
- Þekja náttúrulegra birkiskóga og -kjarrs er um 1,5% af landsvæði Íslands og ýmsir möguleikar til að auka þekjuna og þar með auka kolefnisbindingu. Til þess þarf að innleiða markvissar verndaraðgerðir og endurheimt sem stuðla að aukinni útbreiðslu birkisins.
- Í Landgræðsluáætlun og landsáætlun í skógrækt, Land og líf, eru stefnt að endurheimt birkiskóga á 3,4% af flatarmáli landsins. Sem liður í þessari áætlun þá stefnir ríkið að aukinni útbreiðslu birkiskóga á ríkisjörðum. Samkvæmt Bonn áskoruninni er stefnt enn lengra, eða endurheimt birkiskóga á 5% af flatarmáli landsins árið 2030.
Viðskiptakerfi ESB með losunarheimildir
Viðskiptakerfi með losunarþaki
Viðskiptakerfi ESB með losunarheimildir (e. EU Emissions Trading System; ETS) er viðskiptakerfi með losunarþaki („cap-and-trade“) þar sem þak er sett á heildarlosun frá öllum sem tilheyra kerfinu. Viðskiptakerfið nær til losunar frá staðbundnum iðnaði, flugi og sjóflutningum innan EES sem uppfylla tiltekin viðmið um stærð eða umfang starfsemi.
- Árlega gefur ESB út losunarheimildir og fjöldi þeirra samsvarar heildarlosun sem er heimil frá viðskiptakerfinu það árið. Fjöldi losunarheimilda fer fækkandi milli ára.
- Hluta losunarheimilda er úthlutað endurgjaldslaust til rekstraraðila og flugrekenda í viðskiptakerfinu en hluti þeirra er boðinn upp á uppboðsvettvangi.
- Losunarheimildir ganga milli aðila sem falla undir viðskiptakerfið og annarra þar sem viðskipti með þær eru frjáls.
- Viðskiptakerfið er einn af hornsteinum ESB við að ná samdrætti í losun. Því er bæði ætlað að tryggja að samdráttur í losun eigi sér stað og að hann eigi sér stað þar sem það er hagstæðast.
- Flugstarfsemi hefur fallið undir gildissvið viðskiptakerfisins frá 2012, staðbundinn iðnaður frá 2013 og sjóflutningar frá 2024. Sérstaklega er gerð grein fyrir losun frá flugi og sjóflutningum sem falla undir viðskiptakerfið á vefsíðu Umhverfis- og orkustofnunar.
Staðbundinn iðnaður innan ETS-kerfisins á Íslandi
- Á Íslandi er losun frá staðbundum iðnaði innan viðskiptakerfisins að mestu frá ál- og kísilmálmverum. Árið 2025 var losunin 1,68 milljón tonn CO2-íg. eða 16% af heildarlosun Íslands (með landnotkun) sem er 11% samdráttur frá 2024 en 97% aukning frá 2005. Samdrátturinn milli 2024 og 2025 má rekja til framleiðsluminnkunar í kísil-, kísilmálm- og álframleiðslu.
- Reiknað er með að losunin haldist að mestu stöðug frá 2027.
Alþjóðasamgöngur
Gerð er grein fyrir losun frá alþjóðasamgöngum, þ.e. millilandaflugi og millilandasiglingum, í losunarbókhaldi Íslands. Árið 2025 var losun frá alþjóðasamgöngum um 1,30 milljón tonn CO₂-íg., þar af er meirihluti frá alþjóðaflugi (1,01 milljón tonn CO₂-íg.) meðan minni hluti er frá alþjóðasiglingum (287 þúsund tonn CO₂-íg.).
Losun vegna alþjóðasamgangna dróst saman um 2,6% milli áranna 2024 og 2025. Þennan samdrátt má rekja til 11% samdráttar í losun frá alþjóðasiglingum á tímabilinu. Til lengri tíma má reikna með samdrætti í losun frá alþjóðasamgöngum vegna aukinnar notkunar annarra orkugjafa en jarðefnaeldsneytis.
Losun frá alþjóðasamgöngum náði hápunkti árið 2018 þegar metfjöldi ferðamanna kom til Íslands. Þá var losunin 1,54 milljón tonn CO₂-íg. sem var um það bil jafn mikið og samanlögð losun frá vegasamgöngum og fiskiskipum. Þar af var losun frá alþjóðaflugi 1,29 milljón tonn CO₂-íg.
Sérstaða alþjóðasamgangna í losunarbókhaldi
Eðli alþjóðasamgangna er þannig að það getur reynst ómarkvisst að úthluta ábyrgð vegna losunar þeirra á einstök ríki með afgerandi hætti. Þær reglur sem almennt gilda um losun vegna alþjóðasamgangna í landsskýrslum er að allt eldsneyti sem selt er innan landamæra hvers ríkis til alþjóðasamgangna endar í losunarbókhaldi þess ríkis.
Þetta þýðir að losun frá flugrekanda sem millilendir á Íslandi til að taka eldsneyti er talin fram í losunarbókhaldi Íslands. Þetta skekkir myndina að vissu leyti og er það meðal annars þess vegna sem alþjóðasamgöngur eru teknar fram í viðauka (e. memorandum items) í landsskýrslum. Þar af leiðandi telja alþjóðasamgöngur ekki í heildarlosun en hluti af þeim er talinn fram og gerður upp innan viðskiptakerfis ESB með losunarheimildir.
Var efnið hjálplegt?
Hjálpaðu okkur að bæta gæði efnisins
