Styrkir til 42 verkefna sem draga úr losun frá landbúnaði

Leiðrétting: Áður kom fram að áætlaður samdráttur vegna styrkjanna jafngildi 18% af allri losun gróðurhúsalofttegunda vegna áburðarnotkunar árið 2024. Áætlaður samdráttur vegna styrkjanna er óbreyttur, rúmlega 1000 tonn CO₂-ígilda. Samdrátturinn jafngildir um 1% af heildarlosun gróðurhúsalofttegunda vegna áburðarnotkunar (tilbúins áburðar og húsdýraáburðar) árið 2024. Hann samsvarar jafnframt um 18% af losun CO₂ vegna áburðarnotkunar.

Loftslags- og orkusjóður hefur úthlutað 80 milljónum króna til 42 verkefna sem fela í sér innleiðingu áburðartækni til að draga úr losun gróðurhúsalofttegunda og styðja við sjálfbærari framleiðsluhætti í landbúnaði.

Áætlaður samanlagður samdráttur vegna verkefnanna nemur 1.007 tonnum CO₂-ígilda á ári. Það jafngildir um 1% af heildarlosun gróðurhúsalofttegunda vegna áburðarnotkunar (tilbúins áburðar og húsdýraáburðar) árið 2024. Það er eins og árslosun um 500 fólksbíla sem knúnir eru af jarðefnaeldsneyti.

Alls bárust 83 umsóknir um styrki að fjárhæð 282 milljónir króna. Við mat og forgangsröðun var lögð megináhersla á að styðja þau verkefni sem skila mestum samdrætti í losun á hverja styrkkrónu. GPS-tækni og niðurfellingarbúnaður reyndust almennt hagkvæmustu aðgerðirnar með tilliti til loftslagsáhrifa.

Úthlutunin er liður í forgangsverkefnum ríkisstjórnarinnar í loftslagsmálum, sem Jóhann Páll Jóhannsson, umhverfis-, orku- og loftslagsráðherra, kynnti í september í fyrra.

Í kjölfarið kynntu Jóhann Páll og Hanna Katrín Friðriksson, atvinnuvegaráðherra, áform um styrki til markvissari og loftslagsvænni áburðarnotkunar í gegnum Loftslags- og orkusjóð. Verkefnin fela meðal annars í sér kaup á GPS-stýrðum áburðardreifurum, búnaði til niðurfellingar áburðar og annarri tækni sem eykur nákvæmni við dreifingu og bætir nýtingu næringarefna.